ميلاد بلا أبي المقداد / حسين آل عمار - القطيف

يالجبينك ماي

وذراعك صلاة

گوم وضّي الأمنيات

ماكو من بعدك حياة!

النور شيّب

والشعِر عكازة بيدَه

والطريق الموحشة كلش بعيده

كون عبّدت الطريق بچم قصيده

وكون ذكر حسين ايونسَك

بيده لو خايف يحرسَك

شهگت التربة اعلى عُمرَك

خان هالتُربَة الصبُر

هالترافة اشلون كلفة يحتضن دمها الگبر؟!

تدري مايوازي غيابَك

غير شهگات الصدر

گوم لملم هالشتات

ياللي بسماتك نجاوى

وضحكة شفافك دعاء

نظرتك تنضح سوالف

لمعة عيونك حياء

العشرة صامت عن لقائك

بس إجيت ابكل بهاءك

وافي لنذور اللقاء

بس في ذكرى

ذكرى مليانة صور من دون صوت

ذكرياتك لو يمر بيها اشيمر ميمرها موت

وانته أنقت الصُور بالإبتسامة 

كون ما تحصل سلامة

تبگى بسماتك تسلي الناظرين

وكل منشتاگ الكلامك

كون نلثمها بحنين

"امخوضر احچي"

ابيا حرُف وحيك ختم بيت الدعاء؟

وشلتركت من القصايد؟

شلأخذت ابصدرك الآخر سِمَه؟

هاك حرفي وعلِّمَه

كيف يخلد في الصدور

وكيف يطفي وكله نور

ولمّن اتذوب الطقوس الدنيوية

وماتظل الا الگبور

كون يحييني ابهتافات الخلود

حتى من أترك .. أعود

مثلك انته

ضجّت الدنيا بغيابك .. وانته راحل عنا سكته

رحت وخلّيت برحيلك 

كُل حرف بالدنيا گلته

شلون يخفيك الممات

كُلنا نغفى ابهالـ ( أمل ) 

مجموعة تنعى

وفذ مُهج موجوعة صرعى

والدفى الچان ابحضورك رجّف أطراف البرِد

أدري ماممكن ترِد

وأدري ما أملك سوى امطالَع كلامك

وأنظر لآخر ظهور

حتى لما الدمعة فوگ الخد تِفور

ممكن أدفى

وممكن ابوسط الحزن أجفاني تغفى

ويكشخ ابعيني الدمِع

تدري بأحزاني طبِع

وآنا كل ماتطفي جمرة ابداخل أوجاعي تِشع

جيت أبارك لك يـ(بو المقداد) وبچفوفي مصاحف

بلكن انروح ونناصف

ياللي أحييت الحفل وسط الجنان

چم ملَك گلّك أعِد؟

وشنهو طعم الفرحة في جنة عدن؟

كل شي بالنور انعجن

هيچ حصّة اتوالي حصّة

ياللي يم الكوثر اصعدت المنصّة

حتى تصدح بالشعِر

آه من حرفك يمُر

نفحة جنّاوية تعصف بالمكان

انشوف ذكر حسين يصدح 

ياللي من عابس حملت أعظم صفات

گوم وضي الأمنيات

ماكو من بعدك حياة !!